بسم الله الرحمن الرحيم
السلام عليكم ورحمة الله وبركاته
هوا دا التحدى
مواضيعى اللى فااتت بتكلم عن انى اشتغلت مديكال ريب (مندوب دعاية طبية) والحمد لله دخلت طور العطاله بقالى شهر وعشرين يوم
انا قررت انى مشتغلش مندوب دعاية تانى والاسباب طبعا لانه مش مجالى ,صحيح مجال لذيذ واتعلمت منه كتير قوى ,بس للاسف دش طموحى امشى فيه ,فوقت اه فعلا فوقت اعتقد مش متاخر بس كل مفكر فى اللى جاى وانا عارف ان غلط نفكر فى اللى جاى بس صعب نقنع عقلنا ان يقف لحد النهارده يعنى سعات بيسمع الكلام وغالبا بيشرد ,فى مره بفكر دلوقت لما ربنا يكرمنى واشتغل فى مجالى طبعا الراتب يكاد يكون معرف ,فعلا مش هتعب من الراتب دا وهل ممكن انى افكر اشتغل مندوب دعايه تانى.
كل يوم يتعرض عليا شغل فى الدعاية حتى لسه امبارح واول امبارح واول اول تلات شركات .
انا صحيح رديت بالرفض النهائى
لانى قررت مترددتش انى اعمل حاجه انا عاوزها
حتى عشان لو تعبت اتعب وانا عارف ان دا اختيارى ,
خيبه أمل
بقالى كام يوم كدا مش مظبط حاجه مفيده , سعات اقول دا عيد بقى ومتربطش نفسك بنشاط او حاجه تعملها بس ارجع اقول هوا انا اساسا كنت بعمل ايه .
العيد فرخة
كلمة عيد لوحدها بتفرحنى قوى وتبادل التهانى ببقى سعيد جدا بيه فعلا اجمل ايام وفى شعار جميل قوى تفائلى بحب اقوله كل عيد .....العيد دا أحلى عيد
صلاة العيد اجمل حاجه فعلا والحمد لله ان الدنيا ممطرتش كنا اتغرقنا
الجديد والرائع جدا ان التكبير فى الساحه كان كالاتى:
الله اكبر الله اكبر الله اكبر
لاالله الا الله
الله اكبر الله اكبر
ولله الحمد
لاالله الا الله
الله اكبر الله اكبر
ولله الحمد
وبس
الناس طبعا كانوا مستغربين وشغالين دو دو ودو هوا فى ايه
طبعا الناس متعودين على التكبير الايجبشن الشعبى
الله اكبر الله اكبر الله اكبر
لاالله الا الله
الله اكبر الله اكبر
ولله الحمد
الله اكبر كبيرا
والحمد لله كثيرا
وسبحان الله بكرة واصيلا
لاالله الا الله وحده
صدق وعده ونصر عبده
واعز جنده وهزم الاحزاب وحده
لاالله الا الله
ولانعبد الا اياه
مخلصين له الدين ولو كره الكافرون
اللهم صلى على سيدنا محمد
وعلى ال سيدنا محمد
وعلى اصحاب سيدنا محمد
وعلى انصار سيدنا محمد
وعلى ازواج سيدنا محمد
وعلى ذرية سيدنا محمد
وسلم تسليما كثيرا
والتكبير التانى على حد علمى موردش فى السنه النبويه , وبعد كدا كان السلامات احلى حاجه انك كل الناس بتتجمع فى مكان واحد وكله سعيد ومبسوط وكله بيبتسم ياسلام ياسلام لو الناس تبقى كدا كل الايام ...الايام بقى كله مبوز وكله عنده مشاكل وكله محدش حاسس بيه وكله بياكل فى كله, ربنا يعافينا ويجلعنا عايشين لاخرتنا لاحسن الدنيا بتلهى الواحد ويبص يلاقى نفسه ..... ياحسرتى على ما فرطت فى جنب الله.
بختلف شويه عن معظم زميلى ان بحب اقضى العيد فى البيت والعكس يعنى بحس ان الشوارع كئيبه فى العيد بالذات , وفعلا بتبقى فاضبه وهص هص بعكس ايام الوقفه ورمضان وكدا.
الايام اللى جاية
بما انى كدا كدا هفكر فى اللى جاى اقوله هنا احسن , طبعا روتين الحياة اليوميه اللى نفسى يتغير
ولا اجل كلام فى الموضوع دا احسن لاان التاجيل فى الحاجات دى مفيد جدا جدا
هو احنا كابنى ادميين مش بنعيش كل لحظه بلحظتها يعنى تلاقينا بنصلى وبنفكر فى الشغل وبنشتغل وبنفكر فى الفلوس وفى الفلوس بنفكر هتتصرف فى ايه واحنا بنصرفها بنفكر هنجيب غيرها ازاى.
نفسى اولا اكون كدا, انى اعمل كل حاجه فى وقتها الصلاه صلاه وبس
الشغل شغل وبس
الخروج والفسح برده ترفيه وبس
اعتقد دى حاجه مفيده قوى قوى اننا نركز فى اللى بنعمله وبس
اختم بعيدكم سعيد وربنا يجعل كل ايامكم سعاده وفرحه وسرور ونجاح
والسلام خير ختام
هدية العيد ليكم صور لمدينه القاهره بس حلوين يارب يعجبوكم
دى انا اخترتها خلفيه الجهاز بتاعى
